Ensaios Radioativos, novo libro da colección Polimnia

COMA SEMPRE QUE NACE UN LIBRO, coma sempre que se dá ao mundo, coma sempre que as palabras dun autor se revelan flotando sobre a superficie dunha folla antes en branco, alegrámonos con inmensa e inocente alegría (a dos que, con amor, puxeron o seu gran de area no proceso) de poder soster nas mans estes Ensaios Radioativos que Márcio-André (poeta, performer e ensaísta brasileiro) nos achega.

Dende a visión da «Contaminación» radioactiva que o autor viviu (segundo el nos conta) en Pripyat: «ali (…) circundado pelo silêncio do fim do mundo, eu fazia, ainda que sem saber, um hino às contaminaçôes, além, claro, de me contaminar, tornando-me, provavelmente, o primeiro poeta radioativo do mundo», o escritor déixanos un feixe de ensaios -orixinalmente publicados en Brasil, na editorial Confraria do Vento, no ano 2008- que van dende a poesía até a deriva nómade por cidades, a modo de tuaregs que van buscando un eixo sagrado nas cousas dun mundo posmoderno. Dende Edward Hooper até a física cuántica, Márcio-André, escritor de alto carácter contaminante, proponnos en Ensaios Radioativos un aprofundamento divertido, lúcido e irónico sobre a realidade que estamos acostumados a definir en termos tan estreitos e paradoxais que, ás veces, esta parece quedársenos ben pequena ou ben aburrida e triste. É este un fresco e intenso conxunto de ensaios.

Podedes encontralo xa na Tenda Axóuxere e, en breve, nas librarías. Pronto, a presentación en Compostela e Lisboa.

Que o desfrutedes.