O proceso de okupación, aínda que nunha fase moi primaria, pretende converterse en referencia social da loita anticapitalista, contra a especulación inmobiliaria, pola cultura libre e os espazos liberados, e nace co ánimo de dotar aos movementos sociais galegos dunha nova experiencia e posibilidade de okupación, dando un paso cualitativo no avance deste recente movemento que se vén asentando na Galiza nestes últimos catro anos.

Pregamos que a cidadanía consciente estea pendente da novidades que poidan xurdir a partir deste momento, do mesmo xeito que convidamos a intervir no proxecto, desde dinámicas asemblearias e horizontais.

Sen máis. Unha forte aperta

Saúde

@s activistas que resisten no espazo okupado das Oblatas continúan rexenerando o espazo para próximas actividades.

Durante as últimas horas axentes da Brigada de Información merodearon arredor do edificio, dentro da finca. Posteriormente unha patrulla da policía nacional identificou a dúas das integrantes da asamblea.

A propiedade corresponde a Novacaixagalicia, sendo este un lugar que deixa morrer coa fin de incrementar as súas ganancias cunha actividade especulativa. Nestes tempos nos que as situacións de precariedade se agudizan mentres a gran banca se enriquece á nosa costa, entendemos a acción directa contra os seus intereses coma propia e lexítima da loita anticapitalista.

Este novo espazo trátase, deste xeito, dun espazo sen ánimo de lucro ao que pretendemos dar vida non deixándoo morrer en beneficio duns poucos. Un espazo á marxe do sistema onde poidamos desenrolar dinámicas para autoxestionar as nosas vidas, como a creación de hortas na finca que rodea o edificio; así como obradoiros, charlas e concertos proporcionando actividades fóra das dinámicas do capitalismo. A iniciativa non é máis que outra ferramenta coa que fortalecemos os movementos sociais galegos creando e liberando un novo espazo.

Trátase así dun proxecto aberto a iniciativas populares á marxe de institucións, partidos e sindicatos. Un proxecto no que animamos a participar e colaborar desde os seus inicios co fin de construílo entre tod@s.

Deste xeito defendemos a okupación coma alternativa á crise económica e social; e a autonomía e a autoxestión coma recursos desde os que construír novos xeitos de vida afastados da lóxica capitalista.